وەک جیە چەقۆیگ لە بان دڵ
کرونایش نیمینی، کرونایش دڕوی؛ وەک تاعون، وەک تەمام شاگان، وەک تەمام ئەوانەیگ تەوای بڕون و ئاخری دڕون.
blank

علیرضا قاسمی‌فر (زانا)

وەک حەز و خوەش هاتن دڵم دخواست ئرای یەک جاریش بیە لە کووڕیگ ئەدەبی لە پاریزگای ئیلام بەشداری بکردام. چەنی خوەش بی وەختی کورەگان زەنگ وەم دان و داوای ڕزومەی کاری لەم کردن. دیار بی دخواستن دەعوەتم بکردان ‌ئرای بەرنامیگ فەرهەنگی ئەدەبی لە ئیلام. کەفتمە پل تەقانن کە ئاخری یەکی لە ئاواتە ئەدەبیەگانم دیایە دی و دگه‌مە ئاواتیگ چەن ساڵە.
ڕزوومەگەم ناردم و لە شۊن یەک مانگەوە وەم وتن وەک داور فستیواڵ مناڵ و مەلوجک لەلاین کار وە‌دەسەگان فستیواڵەگەوە ئەڵورژیاگم و تەوای بچمە ئیلام ئرای بەشداری کردن لە فستیواڵەگە.
لە ناکاو خەو و خەیاڵەگانم شیویا وەر خوەم فکرەوە کردم ئەگەر کرونا بمینی، ئەگەر نە‌تۊنەنم بچمە، ئەگەر فستیواڵەکە مەجازی وە ڕێەوە بچی، تەوای چەبکەم؟
هۊردە هۊردە قسیە مینیان کرونا وەک ئاویگ سارد درشیا بان خەیاڵە خوەشەگانا و گشکیان دڕچان.
لە گەرمیش مینی. دەرمانی نیە. خودان لەی بشارنەوە.
وە قەوڵ داڵکم واواس (وەباس) هۆشدان بوو ڕووڵە.
هۆشمان هەس، نیچیمە ناو خیاوان و نیچیمە مهمانی و نیچیمە کافە و نیچیمە لای ڕەفیق و نیچیمە لای باوک و داڵک و… چ زندگی جیاوازیگە چ تام تێڵی، چ جیاوازی ناخوەشی، چ حەسرەتگەل هەتا هەتایی ئاوردیە ودانیایە و خوەیش وسیایە تمشای کرونا وەک کوڕ یەی تەنە بیە بایس خەیاڵە خوەشگان بەشداری کردن لە کوڕیگ ئەدەبی ئیلامی وەک ئاواتیگ چەن ساڵە.
کەی دوارە دەرفەتی بوو بتۊەنیم لە لای یەک دانیشیم و شعر و خوەشەویسی بژنەفیمان خودا دزانی.
وەلی گشتمان خاس دزانم کرونایش نیمینی، کرونایش دڕوی؛ وەک تاعون، وەک تەمام شاگان، وەک تەمام ئەوانەیگ تەوای بڕون و ئاخری دڕون. تەنیا حەسەرتیگ چەن ساڵە وەک جیە چەقۆیگ لە بان دڵ فریە کەس مینی.

 

  • منتشر شده در شماره اول هفته‌نامه سرزمین / دوشنبه ۲۵ اسفند ۱۳۹۹

 

 

  • نویسنده : علیرضا قاسمی‌فر
  • منبع خبر : سرزمین